माहिती (अध्यक्षीय मनोगत )

जय व्याघ्रेश्वर !!!

२७ वर्षांपूर्वी १९९० मध्ये लग्न झाल्यावर प्रथमच श्री देव व्याघ्रेश्वराचें दर्शन झाले आणि मी श्री व्याघ्रेश्वर कुलस्वामी परिवाराची सदस्य झाले. १९९१-९२ दोन वर्षे आम्ही उत्साहाने पुण्याहून महाशिवरात्रीसाठी एस. टी. बसचे आयोजन केले. १९९३ नंतर २००३ पर्यंत व्याघ्रेश्वराशी संपर्क काहीसा तुटल्यासारखा झाला. आसूदला जाणं फार कमी वेळा झालं. २००९ नंतर श्री. धनंजय रानडे यांच्याशी पुन्हा संपर्क प्रस्थापित झाला. मधल्या काळातल्या अनेक घडामोडी त्यांच्या तोंडून ऐकताना थक्क झालो. २०११ मध्ये प्रथमच परिवाराच्या निवडणुकीला हजर राहिलो. श्री व्याघ्रेश्वर कुलस्वामी परिवार शिक्षणनिधी समिती स्थापन झाली. त्यात माझा सचिव म्हणून अंतर्भाव झाला. परंतु दुर्दैवाने या समितीचे कोणतेच उल्लेखनीय कार्य झाले नाही.

२०१४ च्या पुढच्या निवडणुकीत मी व्याघ्रेश्वर परिवाराच्या कार्यकारिणीची सदस्य झाले. दरम्यान २०११ पासून पुन्हा आसूदला जाणे सुरु झाले. व्याघ्रेश्वराच्या कामातला सक्रिय सहभाग वाढू लागला. कार्यकारिणीत प्रवेश झाल्यावर तर पुण्यामध्ये जवळ जवळ प्रत्येक रविवारी चित्पावन संघातील मीटिंगला मी व माझे यजमान हजार राहू लागलो. श्री. धनंजय रानडे यांच्या मनातील व्याघ्रेश्वर मंदिर जीर्णोद्धार व इतर अनेक उपक्रमांना मूर्त स्वरूप देणे किती गरजेचे आहे हे लक्षात आले. त्यासाठी जीवतोड प्रयत्न सुरु झाले. वार्षिक तीनही उत्सवांना अधिकाधिक सुनियोजित करण्यासाठी अध्यक्ष श्री. धनंजय रानडे व इतर कार्यकारिणी सदस्यांच्या मदतीने खूप नव्या कल्पना राबवू लागलो.